ଭଦ୍ରକ : ସମସ୍ତ ଦୁଃଖର ମୂଳକାରଣ ଅଜ୍ଞାନ । ଏହି ଅଜ୍ଞାନ ଯଥାର୍ଥ ପ୍ରଜ୍ଞା ଅଭାବରେ ସୃଷ୍ଟି ହୁଏ । ପ୍ରଜ୍ଞା ପରାଧ ପରି ଭୋଗରୁ ସମାଜ ସୁରକ୍ଷିତ ହେଲେ ମାନବ ସମାଜ ଯଥାର୍ଥ ଜ୍ଞାନ ଆହରଣ କରି ପାରିବ ବୋଲି ମହର୍ଷି ଦୟାନନ୍ଦ ସରସ୍ବତୀଙ୍କ ନିର୍ବାଣ ଦିବସ ଦୀପାବଳି ଦିନ ଆର୍ଯ୍ୟ ସମାଜ ଭଦ୍ରକ ଦ୍ବାରା ପାଳନ ଅବସରରେ ବେଦଜ୍ଞ ପଣ୍ଡିତ ବୀରେନ୍ଦ୍ର କୁମାର ପଣ୍ଡା ପ୍ରକାଶ କରିଥିଲେ । ପ୍ରାତଃ ଯଜ୍ଞ ପରେ ଆଲୋଚନା ସଭାରେ ସୁଧୀର ମୁଦୁଲି, ଘନଶ୍ୟାମ ଲେଙ୍କା ଓ ସଂପାଦକ ଲକ୍ଷ୍ମୀଧର ପଣ୍ଡା ବୈଦିକ ବିଚାରର ପୁନରୁଦ୍ଧାର ପାଇଁ ମହର୍ଷିଙ୍କ ଅବଦାନ ସମ୍ପର୍କରେ ମତବ୍ୟକ୍ତ କରିଥିଲେ । ସ୍ବାମୀଜୀ ବେଦକୁ ଆଧାରକରି ତାଙ୍କର ଅମୂଲ୍ୟ ଗ୍ରନ୍ଥ ସତ୍ୟାର୍ଥ ପ୍ରକାଶ, ଋଗବେଦାଦି ଭାଷ୍ୟ ଭୂମିକା ଓ ସଂସ୍କାର ବିଧି ଆଦି ଗ୍ରନ୍ଥ ମାଧ୍ୟମରେ ଜନସାଧାରଣଙ୍କୁ ସଚେତନ କରାଇଥିଲେ । ଏହି କାର୍ଯ୍ୟକ୍ରମକୁ ରାଜକିଶୋର ସାହୁ, ନନ୍ଦକିଶୋର ସାହୁ, ସହ ସଂପାଦକ ରବି ନାରାୟଣ ଲେଙ୍କା ଆଦି ପରିଚାଳନା କରିଥିଲେ । ସଭାରେ ଆର୍ଯ୍ୟ ସମାଜର ସମସ୍ତ ସଦସ୍ୟ ସଦସ୍ୟାଙ୍କ ସହ ଭଦ୍ରକର ବିଶିଷ୍ଟ ବ୍ୟକ୍ତିମାନେ ଯୋଗଦେଇଥିଲେ ।
