ପୁଣି ଥରେ ରୀତା ସାହୁଙ୍କ ଉପରେ ଆସ୍ଥା ପ୍ରକଟ କରିଛି ବିଜେଡି। ବିଜେପୁର ଉପ ନିର୍ବାଚନ ପାଇଁ ବିଜେଡି ତାର ପ୍ରାର୍ଥୀ ନାଁ ଶନିବାର ଘୋଷଣା କରିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରୀତା ସାହୁଙ୍କ ନାଁରେ ମୋହର ମାରିଛନ୍ତି। ବିଜେପୁର ବିଧାନସଭା ଆସନ ପୂର୍ବତନ କଂଗ୍ରେସ ବିଧାୟକ ସୁବଳ ସାହୁଙ୍କ ଗଡ଼ ରୂପେ ଗଣା ହୁଏ। ତେବେ ତାଙ୍କର ଦେହାନ୍ତ ପରେ ତାଙ୍କ ପତ୍ନୀ ରୀତା ସାହୁଙ୍କୁ ବିଜେଡି ଦଳରେ ମିଶାଇ ପ୍ରାର୍ଥୀ କରିଥିଲା।ଏବଂ ସେଠାରେ ରୀତା ସାହୁ ଅନୁକମ୍ଫାମୂଳକ ଭୋଟ ପାଇ ବିଜୟୀ ମଧ୍ୟ ହୋଇଥିଲେ। କିନ୍ତୁ ପ୍ରାୟ ୧୪ ମାସ ବିଧାୟିକା ରହିବା ପରେ ପୁଣି ସେଠାରେ ୨୦୧୯ ରାଜ୍ୟ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା। ସେତେବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଠାରୁ ପ୍ରାର୍ଥୀ ହୋଇ ବିଜୟୀ ହୋଇଥିଲେ। ସେ ଗଂଜାମ ହିଂଜିଳିରୁ ମଧ୍ୟ ବିଧାୟକ ହୋଇଥିଲେ। ତେବେ ତାଙ୍କୁ ବିଜେପୁର ଆସନ ଛାଡିବାକୁ ପଡିଥିଲା । ଫଳରେ ବିଜେପୁରରେ ପୁଣି ଥରେ ଉପ ନିର୍ବାଚନ ହେବାକୁ ଯାଉଛି। ଅକ୍ଟୋବର ୨୧ରେ ହେବାକୁ ଥିବା ଏହି ନିର୍ବାଚନ ନେଇ ପୂର୍ବରୁ କଂଗ୍ରେସ ଦିଲ୍ଲୀପ ପଣ୍ଡାଙ୍କୁ ପ୍ରାର୍ଥୀ ଘୋଷଣା କରିସାରିଛି।