ଭୁବନେଶ୍ବର, ୧୮/୮ : ଓଡ଼ିଶା କ୍ରୀଡ଼ା ସାମ୍ବାଦିକ ସଂଘ (ଓସ୍ଜା)ର ଅନ୍ୟତମ କ୍ୟାଲେଣ୍ଡର୍ କାର୍ଯ୍ୟକ୍ରମ ଅଶୋକ ପଟ୍ଟନାୟକ ସ୍ମାରକୀ କ୍ରୀଡ଼ା ପ୍ରତିଯୋଗିତା ମଙ୍ଗଳବାର ଉତ୍କଳ କରାଟେ ସ୍କୁଲ୍ ପରିସରରେ ଅନୁଷ୍ଠିତ ହୋଇଯାଇଛି। ପୂର୍ବାହ୍ଣରେ ସ୍ୱର୍ଗତ କ୍ରୀଡ଼ା ସାମ୍ବାଦିକ ଅଶୋକ ପଟ୍ଟନାୟକଙ୍କୁ ଶ୍ରଦ୍ଧାଞ୍ଜଳି ପ୍ରଦାନ କରାଯିବା ପରେ ବଂଧୁକଚାଳନା, ବାଟୁଳି ଓ ବାହୁକୁସ୍ତି ଇଭେଣ୍ଟ୍ରେ ଓସ୍ଜାର ସଦସ୍ୟମାନେ ଅଂଶଗ୍ରହଣ କରିଥିଲେ। ଓସ୍ଜାର ପୂର୍ବତନ ସଭାପତି କେ. ରବିଙ୍କ ସହିତ ସଭାପତି ସନ୍ଦୀପ ମିଶ୍ର, କାର୍ଯ୍ୟକାରୀ ସଭାପତି ସମୀକ୍ଷା ପଟ୍ଟନାୟକ, ଉପ ସଭାପତି ସଂଜୀବ ବିଶ୍ୱାଳ, ସମ୍ପାଦକ ତପନ ସ୍ୱାଇଁ, ଏସ୍ଜେଏଫଆଇ ଉପ ସଭାପତି ସୁରେଶ ସ୍ୱାଇଁ ପ୍ରମୁଖ ସ୍ୱର୍ଗତ ପଟ୍ଟନାୟକଙ୍କ ସ୍ମୃତି ଚାରଣ କରିଥିଲେ। ଉତ୍କଳ କରାଟେ ସ୍କୁଲ୍ର ପ୍ରତିଷ୍ଠାତା ହରି ପ୍ରସାଦ ପଟ୍ଟନାୟକ, ଓଡ଼ିଶା ଭାରୋତ୍ତୋଳନ ସଂଘ ସଭାପତି ଚିତ୍ତରଂଜନ ସ୍ୱାଇଁ, ଓଡ଼ିଶା କରାଟେ ସଂଘ ସମ୍ପାଦିକା ଗୌରୀ ମହାନ୍ତି ପ୍ରମୁଖ ଉପସ୍ଥିତ ଥିଲେ। ବିଭିନ୍ନ ବର୍ଗର ବିଜେତା ଖେଳାଳିଙ୍କୁ ଅଗଷ୍ଟ ୨୯ ତାରିଖରେ ଉତ୍କଳ କରାଟେ ସ୍କୁଲ୍ର ପ୍ରତିଷ୍ଠା ଦିବସ ଅବସରରେ ପୁରସ୍କୃତ କରାଯିବ।
ବଂଧୁକଚାଳନା ପ୍ରତିଯୋଗିତାରେ ମହିଳା ବର୍ଗରେ ସମୀକ୍ଷା ପଟ୍ଟନାୟକ (୫୦+ ବୟସ ବର୍ଗ) ଏବଂ ଶୁଭଲକ୍ଷ୍ମୀ ବଳ (୫୦ ବର୍ଷରୁ କମ୍)ରେ ବିଜେତା ହୋଇଥିବାବେଳେ ମହିଳା ବାହୁକୁସ୍ତିରେ ଶୁଭଲକ୍ଷ୍ମୀ ବିଜୟିନୀ ଓ ସମୀକ୍ଷା ଉପବିଜୟିନୀ ହୋଇଥିଲେ। ବଂଧୁକଚାଳନାର ୫୦ରୁ କମ୍ ବୟସ ବର୍ଗରେ ଚକ୍ରଧର ମାଝୀ, ପ୍ରଫୁଲ୍ଲ କିଶୋର ସାହୁ, ଦେବାଶିଷ ସୁନ୍ଦରାୟ ଏବଂ ୫୦+ ବୟସ ବର୍ଗରେ ସର୍ବେଶ୍ୱର ମହାନ୍ତି, ସୁରେଶ ସ୍ୱାଇଁ, ସନ୍ତୋଷ ମହାନ୍ତି ଯଥାକ୍ରମେ ସ୍ୱର୍ଣ୍ଣ, ରୌପ୍ୟ, କାଂସ୍ୟ ପଦକ ବିଜେତା ହୋଇଥିଲେ।
ବାଟୁଳି ପ୍ରତିଯୋଗିତାରେ ସୁରେଶ ସ୍ୱାଇଁ ସ୍ୱର୍ଣ୍ଣ, ତପନ ସ୍ୱାଇଁ ରୌପ୍ୟ ଓ ବିମଳ ରାଉଳ ବ୍ରୋଞ୍ଜ ପଦକ ପାଇଥିଲେ। ୭୦ କିଲୋଗ୍ରାମରୁ କମ୍ ଓଜନ ବର୍ଗ ବାହୁକୁସ୍ତିରେ ଶକ୍ତି ପ୍ରସାଦ ନନ୍ଦ, ପ୍ରଫୁଲ୍ଲ କିଶୋର ସାହୁ, ରଜନୀକାନ୍ତ ଶତ୍ରୁଶଲ୍ୟ ଏବଂ ୭୦ କିଲୋଗ୍ରାମରୁ ଅଧିକ ଓଜନ ବର୍ଗରେ ସୁକେଶ ରଂଜନ ବେହେରା, ସନ୍ଦୀପ ମିଶ୍ର, ଅନାଦି କର ଯଥାକ୍ରମେ ସ୍ୱର୍ଣ୍ଣ, ରୌପ୍ୟ ଓ କାଂସ୍ୟ ପଦକ ଜିତିଥିଲେ।
ବଂଧୁକଚାଳନା ପ୍ରତିଯୋଗିତାକୁ ଗୁରୁପଦ ମହାନ୍ତି, ରତିରଂଜନ ସ୍ୱାଇଁ, ପି ଆକାଶ କୁମାର ଏବଂ ବାଟୁଳି ପ୍ରତିଯୋଗିତାକୁ ରାଜ୍ୟ ସଂଘ ସମ୍ପାଦକ ସପନ କୁମାର ମିଶ୍ର ପରିଚାଳନା କରିଥିଲେ। ବାହୁକୁସ୍ତି ଇଭେଣ୍ଟ୍କୁ ସାଗର ସ୍ୱାଇଁ, ଜୟନ୍ତ କୁମାର ବେହେରା, ଧନେଶ୍ୱର ସାହୁ ଓ ସନତ ମାହାର ପରିଚାଳନା କରିଥିଲେ।
