ସଫଳତା ଯେମିତି ଦୂତିଙ୍କ ପିଛା ଛାଡୁନି। ଗୋଟିଏ ପରେ ଗୋଟିଏ ସଫଳତା ପାଇ ଦୂତି ରାଜ୍ୟ ତଥା ଦେଶ ପାଇଁ ଗୌରବ ବଢାଇ ଚାଲିଛନ୍ତି। ଭାରତରେ ଶ୍ରେଷ୍ଠ କ୍ଷମତାଶୀଳ ବ୍ୟକ୍ତିଙ୍କ ମଧ୍ୟରେ ସ୍ଥାନ ପାଇସାରିଥିବା ଦୂତି ଏବେ ବିଶ୍ୱ ସ୍ତରରେ ମଧ୍ୟ ନିଜ ଦବଦବା ଜାହିର କରିଛନ୍ତି। ବିଶ୍ୱ ପ୍ରସିଦ୍ଧ ଟାଇମ ପତ୍ରିକାରେ ସ୍ଥାନ ପାଇଛନ୍ତି ଦୂତୀ। ବିଶ୍ୱର ୧୦୦ ପ୍ରଭାବଶାଳୀ ତାଲିକାରେ ଦୂତିଚାନ୍ଦ ସ୍ଥାନ ପାଇଛନ୍ତି। ଉଭୟ ପଡିଆରେ ଓ ପଡିଆ ବାହାରେ ଲଢି ସଫଳ ହେବାପରେ ଦୂତିଙ୍କୁ ଏହି ସଫଳତା ମିଳିଛି। ବିଶ୍ୱର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ଥିବା ବ୍ୟକ୍ତିଙ୍କୁ ଏହି ପତ୍ରିକା ସ୍ଥାନ ଦେଇଥାଏ। ଏହି ପତ୍ରିକାର ସମ୍ପୂର୍ଣ୍ଣ ତାଲିକା ଆସନ୍ତା ନଭେମ୍ବର 25 ତାରିଖରେ ପ୍ରକାଶ ପାଇବ। ଏହାପୂର୍ବରୁ ଇଣ୍ଡିଆ ଟୁଡେ ପତ୍ରିକାରେ ଦେଶର ଶ୍ରେଷ୍ଠ 50 ଜଣ କ୍ଷମତାଶୀଳ ବ୍ୟକ୍ତିଙ୍କ ତାଲିକାରେ ସ୍ଥାନ ପାଇଥିଲେ। ଦୂତିଙ୍କ ଏହି ସଫଳତା ପାଇଁ ବିଭିନ୍ନ ମହଲରୁ ଶୁଭେଚ୍ଛାର ଶୁଅ ଛୁଟିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଟ୍ୱିଟ୍ କରି ଦୂତିଙ୍କୁ ଶୁଭେଚ୍ଛା ଜଣାଇବା ସହ ଓଡ଼ିଶା ପାଇଁ ଏହା ଏକ ଗୌରବର ବିଷୟ ବୋଲି କହିଛନ୍ତି।
ଦୂତି ଏବେ ୨୦୨୦ ଟୋକିଓ ଅଲମ୍ପିକ୍ସ ପାଇଁ ଦୂତି ଏବେ ଜୋରଦାର ଆଭ୍ୟାସ ଚଲାଇଛନ୍ତି ଏବଂ ସେ ଆଶାବାଦୀ ଅଛନ୍ତି ଯେ ତାଙ୍କୁ ପୁଣିଥିରେ ଅଲମ୍ପିକ ଟିକେଟ୍ ମିଳିବ।