ପୁଣି ଥରେ ରାଜଧାନୀ ଭୁବନେଶ୍ୱରରେ ଦେଖିବାକୁ ମିଳିବ ହକି କ୍ରେଜ୍। କଳିଙ୍ଗରେ କମାଲ କରିବେ ଭାରତୀୟ ଖେଳାଳି। ଖେଳାଯିବ ଏଫଆଇଏଚ୍ ଅଲିମ୍ପିକ କ୍ୟାଲିଫାୟର୍ସ ପ୍ରତିଯ଼ୋଗିତା। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇ ସାରିଛି। ଷ୍ଟାଡ଼ିୟମ ବି ପ୍ରସ୍ତୁତି, ଖେଳାଳି ବି ପ୍ରସ୍ତୁତି କେବଳ ଅପେକ୍ଷା ମ୍ୟାଚକୁ। ନଭେମ୍ବର ୧ ଓ ୨ ତାରିଖରେ ଉଭୟ ପୁରୁଷ ଓ ମହିଳା ବର୍ଗରେ ଏହି ପ୍ରତିଯ଼ୋଗିତା ଖେଳାଯିବ। ଏଥିପାଇଁ ଭୁବନେଶ୍ୱର କଳିଙ୍ଗ ଷ୍ଟାଡ଼ିୟମରେ ଭାରତୀୟ ଟିମ୍ ସହ ବିଦେଶୀ ଦଳର ଖେଳାଳିମାନେ ଜୋରଦାର ଅଭ୍ୟାସ କରୁଛନ୍ତି। ଭାରତୀୟ ପୁରୁଷ ଦଳ ଋଷିଆ ସହିତ ଓ ଭାରତୀୟ ମହିଳା ଦଳ ଆମେରିକା ସହିତ ମ୍ୟାଚ୍ ଖେଳିବ। ପୁରୁଷ ବର୍ଗରେ ଦୁଇଟି ଓ ମହିଳା ବର୍ଗରେ ଦୁଇଟି ଲେଖାଏ ମ୍ୟାଚ୍ ଖେଳାଯିବ। ଯେଉଁ ଟିମ ଆକର୍ଷଣୀୟ ଖେଳ ପ୍ରଦର୍ଶନ କରି ଅଧିକ ପଏଣ୍ଟ ପାଇବ ସେହି ଟିମ୍ ଟୋକିଓ ଟିକେଟ୍ ହାତେଇବ। ଅଲିମ୍ପିକ୍ କ୍ୱାଲିଫାୟାର୍ସ ପାଇଁ ରାଜଧାନୀବାସୀଙ୍କ ସମେତ ହକି ପ୍ରେମୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ସେପଟେ ଭାରତୀୟ ପୁରୁଷ ଦଳ ଏବେ ଭଲ ଫର୍ମରେ ଗତି କରୁଛି। ଘରୋଇ ପରିବେଷରେ ଋଷିଆ ଭଳି ଏକ ଦୁର୍ବଳ ଦଳକୁ ଭାରତ ସହଜରେ ହରାଇବା ସହ ଅଲିମ୍ପିକ ଟିକେଟ୍ ହାତେଇବାକୁ ଦଳ ଆଶାବାଦୀ ଅଛି। ତଥାପି ଋଷିଆକୁ ସହଜରେ ଗ୍ରହଣ ନ କରିବାକୁ କୋଚ୍ ପରାମର୍ଶ ଦେଇଛନ୍ତି। ଭାରତ ପାଇଁ ଅଲମ୍ପିକ ଯ଼ୋଗ୍ୟତା ଅର୍ଜନ କରିବାକୁ ଶେଷ ସୁଯ଼ୋଗ ହୋଇଥିବାରୁ ଦଳ ସବୁ ଦମ ଲଗାଇଦେବ ବୋଲି ଟିମ୍ ଇଣ୍ଡିଆରେ ସ୍ଥାନ ପାଇଥିବା ଏକମାତ୍ର ଓଡ଼ିଆ ଖେଳାଳି ଅମିତ ରୋହିଦାଶ କହିଛନ୍ତି।
ସେପଟେ ପ୍ରଥମ ଥର ପାଇଁ ଭାରତୀୟ ମହିଳା ଦଳ କଳିଙ୍ଗ ଷ୍ଟାଡ଼ିୟମରେ ମ୍ୟାଚ୍ ଖେଳୁଥିବାରୁ ଦଳ ବେଶ ଉତ୍ସାହିତ ଅଛି। ଘରୋଇ ପରିବେଶରେ ଦଳ ଭଲ କରିବା ବୋଲି ଦଳର ପ୍ରମୁଖ ଖେଳାଳି ତଥା ଓଡ଼ିଆ ଝିଅ ଲିଲିମା ମିଞ୍ଜ କହିଛନ୍ତି। ସେ କହିଛନ୍ତି ମ୍ୟାଚ ବେଳେ କୈାଣସି ଦଳକୁ ଦୁର୍ବଳ ମନେକରିବା କଥା ନୁହେଁ। ଆମେରିକା ଦଳ ବିଶ୍ୱମାନ୍ୟତାରେ ପଛରେ ଥିଲେ ବି ଭରତୀୟ ଦଳ ପ୍ରସ୍ତୁତି ହୋଇକି ପଡ଼ିଆକୁ ଓହ୍ଲାଇବ ବୋଲି ସେ କହିଛନ୍ତି।
