ଯମରାଜାକୁ ନୋଟିସ୍ ପଠାଇବାକୁ କୋଲକତା ହାଇକୋର୍ଟରେ ଆବେଦନ। ଏଭଳି ଘଟଣା ପଶ୍ଚିମବଙ୍ଗ ଅଲୀପୁରରେ ଦେଖିବାକୁ ମିଳିଛି। ଦୁଇଜଣ ଦୋଷୀଙ୍କ ପରିବାର ପକ୍ଷରୁ ଏନେଇ ଆବେଦନ କରାଯାଇଛି। ଦୋଷୀମାନେ ଦଣ୍ଡ ଭୋଗିବା ପୂର୍ବରୁ ମୃତ୍ୟୁବରଣ କରିଥିବାରୁ ଦଣ୍ଡ ପୂରଣ ପାଇଁ ଯମରାଜ ସେମାନଙ୍କୁ ପୃଥିବୀକୁ ପଠାଇବା ଲାଗି ହାଇକୋର୍ଟ ନୋଟିସ୍ ଜାରି କରନ୍ତୁ ବୋଲି ଆବେଦନରେ ଦର୍ଶାଯାଇଛି। ଏକ ହତ୍ୟା ମାମଲାରେ ସମର ଚୌଧୁରୀ ଏବଂ ପ୍ରଦୀପ ଚୌଧୁରୀଙ୍କୁ ଅଲୀପୁର ଅଦାଲତ ପକ୍ଷରୁ ୫ ବର୍ଷର କାରାଦଣ୍ଡାଦେଶ ଦିଆଯାଇଥିଲା। ତେବେ ଦୋଷୀ ପ୍ରଦୀପଙ୍କ ମୃତ୍ୟୁ ୧୯୯୩ରେ ହୋଇଥିବାବେଳେ ସମରଙ୍କ ମୃତ୍ୟୁ ୨୦୧୦ରେ ହୋଇସାରିଛି। ଅଦାଲତଙ୍କ ପକ୍ଷରୁ ୨୦୧୬ ଜୁନ୍ ୧୬ରେ ଦଣ୍ଡାଦେଶ କରାଯାଇଥିଲା। ତେବେ ଏଥିପାଇଁ ଦୋଷୀଙ୍କୁ ଯମଲୋକରୁ ପୃଥିବୀକୁ ଆଣିବା ଲାଗି ପ୍ରଦୀପଙ୍କ ପୁଅ ଅଶୋକ ଚୌଧୁରୀ ଏବଂ ସମରଙ୍କ ସ୍ତ୍ରୀ ରେଣୁ ଅଦାଲତର ଦ୍ୱାରସ୍ଥ ହୋଇଛନ୍ତି।